"Контактри" сӑн

Шупашкар округӗнче пурӑнакансем Кӑкшӑм юханшывӗ урлӑ хывнӑ кӗпере хӑйсемех туса хунӑ. Кивви ҫулла йывӑр тиевлӗ машинӑна пула йӑтӑнса аннӑ. Вырӑнти тӳре-шара ҫӗнӗ кӗпере 2025 ҫулта туса пама шантарнӑ. Анчах халӑх кӗтсе ларман – хӑйсем тытса тунӑ. Ӑна бетонран хатӗрленӗ.

Кӗпер мӗнле пулассине Павел Кириллов шухӑшласа кӑларнӑ. Халӑх 400 пин тенкӗ пухнӑ. Кунсӑр пуҫне хӑйсен стройматериалӗсемпе те, техникӑпа та усӑ курнӑ.

"Контактри" сӑн

Шупашкар округӗнче ҫӑлкуҫ нумай. Нумаях пулмасть Явӑш ялӗнчи ҫӑлкуҫа хӑтлӑлатнӑ.

Унта утма меллӗ пултӑр тесе ҫул йӗркеленӗ, ҫанталӑк пӑсӑлсан пытанмалли вырӑн хатӗрленӗ, йывӑҫ-тӗм лартнӑ. Ҫапла вырӑн хитре те хӑтла пулса тӑнӑ.

Ку ӗҫе ялти ҫынсем тата Вырӑс географи обществи хутшӑннӑ.

«Про Город» архивӗнчи сӑн

Муркаш округӗнчи Рыккакасси ялӗнче пурӑнакансем карас телефон ҫыхӑнӑвӗн вышкине ан лартчӑр тесе ҫав вырӑна талӑкӗпех черетпе сыхланӑ. Усси пулнӑ. Нумаях пулмасть унти стройматериалсене ялтан кӑларма тытӑннӑ, вышкӑна ял айккинче лартӗҫ.

Ялта лавкка патӗнче пӗр вышка пур ӗнтӗ. Теприне лартассине вара халӑхпа канашламан. Ҫав вырӑнта вара халӑх ача-пӑча лапамӗ тума палӑртнӑ. Вырӑна пӗр уйӑх ытла сыхланӑ хыҫҫӑн хӑйсенне ҫӗнсе илнех – вышкӑна ял айккинче лартӗҫ.

"Контактри" сӑн

Хӗрлӗ Чутай округӗнчи Атнар ялӗнче халь Вӑрман урамне чӑрмавсӑрах ҫитме пулать. Унта юханшыв урлӑ каҫмашкӑн каҫӑ тунӑ.

Ку ӗҫе Валентин Морозов, Александр Мадебейкин, Николай Абрамов тата Михаил Абаськин тытнӑ та тунӑ. Ҫапла, ял ҫыннисем ҫакнашкал пӗлтерӗшлӗ ыйтӑва хӑйсем тӗллӗн татса панӑ.

Улатӑр округӗнчи Атрать ялӗнче пурӑнакансем масар ҫинче тирпейленӗ – унти йывӑҫ-тӗме каснӑ.

Чылай ҫӗрте халӗ йывӑҫ-курӑк хӑй тӗллӗн шӑтса тухать. Атрать ялӗнче пурӑнакансем вара масар ҫинчисене тасатма шутланӑ. Ҫула тасатнӑ хыҫҫӑн унпа ҫӑмӑл автомобильсем кӑна мар, ытти транспорт та кайма пултарать.

Трактора «Сӑрҫи» ГПЗ тата ялти Александр Россейкин, Андрей Липатов уйӑрса панӑ.

"Контактри" сӑн

Канаш округӗнчи Янкӑлч ялӗнче Пӗтӗм Раҫҫейри «Раҫҫейри шыв» акци иртнӗ. Унта Янкӑлчри шкулта 6-мӗш класра вӗренекенсем хутшӑннӑ.

Ачасем таврара йӑваланакан ҫӳп-ҫапа михӗсене пуҫтарнӑ. Уйӑрса панӑ территорие вӗсем йӑлтах тасатнӑ. Пӗтӗмпе виҫӗ михӗ пухӑннӑ.

Шупашкар муниципаллӑ округӗнчи Мӑштавӑш ялӗнче пурӑнакансем тахҫан тунӑ ҫӑлкуҫа ҫӗнетнӗ. Ку ӗҫе ялти хастар ҫынсем хутшӑннӑ.

«Пирӗн ҫӑлкуҫсем, Ҫӗр айӗнчен тухса тӑраканскерсем, нихӑҫан та тапма чарӑнман. Ҫак ҫӑмӑлах мар ӗҫе хутшӑннӑ хастар ҫынсене пысӑк тав сӑмахӗ калас килет. Эпир пӗрле – вӑй!» - савӑнӑҫлӑн пӗлтернӗ мӑштавӑшсем.

komandirovka.ru сайтри сӑн

Кӑҫал чӳк уйӑхӗн 29-мӗшӗччен Краснаормейски округӗнчи Пшонкӑ ялӗнчи пӗве хӗрринче пляж вырӑнӗ пулмалла. Округ администрацийӗ ҫак тӗллевпе 6 миллион тенкӗ уйӑрма хатӗр.

Аукционра ҫӗнтернӗ подрядчикӑн хӑйӑрлӑ пляж, пластик понтон тумалла, тӗрлӗ ӳсӗмри ачасене шыва кӗмешкӗн вырӑнсем уйӑрмалла. Ҫавӑн пекех пляж кабини, информаци паллисем пулӗҫ. Понтон 50 метр тӑршшӗ, 60 метр сарлакӑш пулӗ. Ӑна сивве чӑтакан материалтан тумалла.

culture.cap.ru сӑнӳкерчӗкӗ

Канаш муниципаллӑ округӗнчи Мӑкӑр ялӗнчи клуба ҫӗнетсе пӗтренпепе пӗрех.

Округ пуҫлӑхӗ Сергей Михайлов Мӑкӑр ялӗнче пурӑнакансем питех те хастар тесе каланӑ май вӗсем тӗрлӗ конкурса хутшӑннине, тӗрленине, ҫыхнине, юрлама ӑста пулнине пӗлтернӗ. Кӗмӗл волонтёрсен отрячӗ те пур-мӗн.

Ялта 400 ытла ҫын пурӑнать. Ялти клуб вӗсене питех те кирлӗ. Кивӗ ҫурт юрӑхсӑра тухнӑ, туалет та урамра-мӗн. Малашне те йӑлитах урӑхла пулӗ.

Ҫӗнӗ ҫурт авӑн уйӑхӗн вӗҫӗнче уҫӑлӗ.

cap.ru сӑнӳкерчӗкӗ

Канаш округӗнчи Мӑкӑр ялӗнче клуба юсаса ҫӗнетеҫҫӗ. Ӑна «Тӑван ен культури» парти проекчӗпе килӗшӳллӗн тӑваҫҫӗ.

Мӑкӑр ялӗнче ҫӗнетнӗ клуб питӗ кирлӗ. Унта 400 ытла ҫын пурӑнать. Кивӗ ҫурт тахҫанах ӗнтӗ юрӑхсӑра тухнӑ. Нушапа та урама кайма тивнӗ. Халӗ йӑлтах ҫӗнӗлле пулӗ.

Ҫӗнӗ клуба аван уйӑхӗн вӗҫӗнче уҫма палӑртнӑ. Унӑн фасачӗ кӑна мар, шалти те улшӑнӗ. Сценӑсӑр, 100 вырӑнлӑ залсӑр пуҫне библиотека, музей пулӗҫ.